شعر شعبي حزين وكبرياء لنفسي
- يا الله استرني ب سترك يا العظيم الباري
- عن هروج الشامتين و شرهة المتشرة
- البنادم دون سترك والله انه عاري
- لو يحسب الستر ثوب يلبسه و يزره
- نفسي الأمارة أغواها ابليس اجباري
- والندم ينهش طوارف كبدي المحتره
- تكثر اخطائي و يكثر بعدها استغفاري
- وارجع اخطي وارجع استغفرك ثاني مره.
- –
- طرالي البارحة والليل عيا يفوت
- واليا طرالي عظامي تيبس وأرتعد
- متحاشي الذكريات بكل شارع وصوت
- وعدت نفسي وانا صامل وقد الوعد
- من بعد ليلة غيابه صرت احب السكوت
- وصرت انعزل عن جمعة العالم وابتعد
- تغيرت حالتي حتى ف لعب البلوت
- من عقب ما هم يسموني قبيل السعد.
- –
- للحب مفهوم عمرك ما تخيلته
- ما أظن يستوعبه تفكيرك السامي
- هذا الفراق الطويل وهذي اسألته
- هذا حصاد السنين وهذي أيامي
- ياما وياما عليك البال طولته
- والعمر عدى و أنا عايش على أوهامي
- حتي طريق الفراق اللي تساهله
- لقيته أصعب على نفسي من أقدامي.
- –
- عزت علي نفسي ولأني بملزوم
- أقربك من بعد ما رحت عني
- إلى متى في دربك أطيح وأقوم
- وأجيك متعني وأرد متعني
- ليه أتأمل وأنتظر وصل معدوم
- وليه أتمنى وش يفيد التمني ؟
- لو إني أدري وش ورا الغيم مقسوم
- ما كان حبيتك ولا خاب ظني.
- –
- لو أحاول انسى ما مضى وادرك الأسباب
- انا شايف ان القلب ماهوب متشالي
- اضيع دليل الراي واخطي طريق الباب
- ولا عاد افكر في خروجي .. ومدخالي
- واسامر سواد الليل ونجومه السكاب
- واسولف على نفسي وانا فالخلا الخالي
- هواجيس قلبي بالدقيقه تجيه اسراب
- وانا مابكيت الماضي الا من هبالي
- –
- الناس تالي قاصر الله شوفها
- ما عاد اميز حسدها ومعروفها
- تعطيك لا من بنت من حالي النبا
- وعليك لا قفيت صفت صفوفها
- وانا ما علي وان كثروا بي هروجهم
- سحابة شموخ وعز تبرق قنوفها
- نفسي لها مذهب تعامل به الملا
- ثابت ولو كثرت عليها ظروفها.
- –
- يا حظ من حط ذكر الله لجوفه رفيق
- زهدا بالأبواب فاتحها ومقفولها
- الأرض لله والانسان حر طليق
- والله يحاسب عباد الله بفعولها
- يا رب لا تختبر نفسي بما لا تطيق
- ورضاك يا رب غايتها ومدلولها
- الحمد لك والثناء اللي في جلالك يليق
- يا الله عفوك ومغفرتك وما حولها.
- –
- حبيبي عسى ما باقي بذاكرتك أيام ؟
- انا نهايتي مع ذكرياتك من الليلة
- قدرت اتخطى من تعلقت فيه العام
- عسى الفايت من العمر فدوة مقابيله
- اثر نفسي ان طابت من الوصل ماتنلام
- واثر عيني اليا عافتك .. مالها حيله
- ماتلحق جزا صبري على ضيعة الاحلام
- ولا دمعي اللي طاح .. تاصل مواصيله.
- –
- تحسب إني ساليه عنك و إلا بستريح
- يوم عادي حلوة وزينتي ما أهملتها
- و إلا أنا ياحر جوفي ماغير أمشي وأصيح
- كثر ما أحبك ما بين السوالف قلتها
- رح فمان الله ، ما أقول لك رح في قريح
- لو نفسي فوق ما تشتهي حملتها
- يوم تدري إنك بتقفي وبيضيق الفسيح
- ليتك من أول من الحب ما أملتها.
- –
- خذاك الكبر ف انا سليل الكبار
- اللي تناقل فعايلهم شيووخ الهجر
- جدودي اللي مسيرتهم بكل اختصار
- مخلدين الفعول و كاسبين الأجر
- من دون نفسي ما أحب الذل والانكسار
- نفسي عزيزة و قلبي دون نفسي حجر
- ما هابوا جدودي الفرسان فوق المهار
- وشلون أخالف جدودي وأخاف الهجر.
- –
- أغنيت نفسي ودرب العز مغنيني
- عن واقع من وراه الكبد مندبله
- صار الخطأ والمجامل شي روتيني
- كل يبي الطيب بالتزوير ينسب له
- ما الله على مجامل الغاوين حاديني
- نفسي على الصدق معتاده ومنجبله
- أسمي وتركيبتي .. والوازع الديني
- لا أغواني أبليس ردتني على القبله.
- –
- مسيرك على درب المحبة شوي شوي
- ترى الاندفاع يورد القلب لجروحه
- وانا من سريتك يالظلام وفقدت الضي
- وعيني من اللي ودها فيه مفضوحه
- اكذب على نفسي ليا قلت نفس الشي
- وهي والله انها غير عن كل مملوحه
- ملذة حياة وحطها الوقت بين يدي
- ونزعها مثل ما تنزع من الجسد روحه.
مقالة مشابهة: أقوى أشعار عن النفس شعبية
قصيدة قمت أذكر نفسي بنفسك
في شتات البال و الرهبه من برودي لحالي
قمت أذكر نفسي بنفسك و أثاريني نسيتك
ياغرابه هالشعور اللي هقيت أنه محالي
مرت الايام مثل البرد ياجمر و وطيتك
اتذكر دون ذكرك ذكريات اللي مضالي
كن ماعمري عرفتك كن ماعمري هويتك
واذكر وجيه مرور كرام مروني ليالي
وما ذكرتك وأنت وجهك بعتله عمر وحييتك ؟
و عفت قربك كثر ما كنت أعشق شوفك قبالي
وبك فديت البسمه اللي كم بضحكتها فديتك
كان فيك اللي يضيق خاطر الشرح الشمالي
كان فيك اللي رخيص يباع لكني شريتك
مو حرام أنساك و اخون الوعد ولا أبالي
الحرام أخونها نفسي عشان أطلع وفيتك
صرت ما اشتاق وصلك صرت ما اخاف أنعزالي
و صرت آمره شارعك ولا أنتبه مريت بيتك
من يصدق صرت انام الليل ما يطريك بالي
من يصدق لا طروك الناس عندي ما بكيتك
من كثر ما كنت أبكيلك ياكم غالي بكا لي
أحسبوك الميت اللي من غلاتك ما رثيتك
مادروا بإني رخصتك و الشعر مسكنه غالي
ما تمر البيت زاير بعد كان البيت بيتك
والله إني خفت مني قسوتي ، كبر احتمالي
كيف قواني المفارق كنت اموت وما قويتك
من كثر ما عفت يمكن لو وطت رجلك ظلالي
ما تقبلت السموحه و ما استرتحت الا وطيتك.